 |
| يااللى بنيتوا الهرم الأكبر |
يااللى بنيتوا الهرم الأكبر
وبنيتوا خزان أسوان
بإيدين سمرا حرة عفية
مليانة أمل وحنان
أصحوا تعالوا شوفوا إيدينا
هى إيديكم زى إيدينا
بس الدنيا مهياش دنيا
زى زمان
يوم مابنيتوا الهرم الأكبر
* * *
راح نتعلم ننسى جروحنا
ننسى سنين كلها احزان
يوم ماالغادر جه وجرحنا
وجرحوا احبابنا والخلان
نسيوا إننا مش راح نتألم
أكتر من اجدادنا زمان
لما الدنيا دى كانت دنيا
مش طوفان
وبرضوا بنيتوا الهرم الأكبر
* * *
مش راح ننسى يوم مامشينا
رايحين سوى ماسكين كراس
قالوا يوميها ازاى نتعلم
لازم نفضل نمسك فاس
خافوا يوميها نطلع سلم
واللى فى ايدنا يقع فى الراس
يومها سبتنا الدنيا بحالها
برضو سبونا كل الناس
نسيوا ساعتها الهرم الأكبر
* * *
يااللى بنيتوا الهرم الأكبر
فاكرين برضو مش ناسيين
يوم ماعبرنا ستة اكتوبر
قالوا ساعتها إننا صاحيين
من كام سنة والدم بيغلى
دم الحر ماهم عارفين
إن الدنيا فى يوم راح ترجع
زى زمايل متخاصمين
يومها سمعنا الجيش بيكبَّر
قالوا ساعتها د مصر بتعبر
مصر بتعبر
يومها افتكروا الهرم الأكبر
* * *
يااللى بنيتوا السد العالى
وكفاحكم ده قريب
مش راح ينسى كل شبابنا
يوم مافارقنا اعز حبيب
بس دعونى اليوم اكلم
ودى حفلة تنصيب
لأجل ماتظهر فينا البسمة
ندى مكافئة لكل مقرر
بيها نعبر
عن حبنا للهرم الأكبر
* * *
لأجل ماتظهر فينا الكلمة
يومها اختار الكل (عصام)
لأجل مشاغله وكتر اعماله
قالوا د (حمدى) خليفته تمام
يومها لقينه (حسن) فى يمينه
(قدح) د زميله (علاء) قدام
و (قشطة) عليه وده راجل تانى
بس خسارة واخدها كلام
أما (العايدى) هو و(سيد)
عايشين سوى الأثنين أوهام
أما ف(ماجد) هو و(عيد)
لسة نشاطهم جاى قدام
خدها صريحة الكلمة دهية
أصلى أعرفهم زيى تمام
لأجل ماتعرف كل الدنيا
إن الدنيا مهياش دنيا
زى زمان
بس هنفضل برضه نكرر
مش راح نصغر لازم نكبر
أصل أبونا الهرم الأكبر
أيوة أبونا الهرم الأكبر
قالها زمان
لازم نكسر عين الدنيا
زى ماكسروا عينها زمان
مش راح نسكت
مش راح نكتم
مش هنريح لينا لسان
لازم تعرف كل الدنيا
ان الدنيا مهياش دنيا
واحنا بقينا زى زمان
يوم مابنينا الهرم الأكبر
* * *
ألقت فى حفل تنصيب اتحاد الطلاب بالمعهد
تعليقات
إرسال تعليق